ഭൂവിനിയോഗ ബോർഡ് ശക്തിപ്പെടുത്തൽ (വിഹിതം:157.00 ലക്ഷം രൂപ)

    ഭൂവിനിയോഗ വകുപ്പ്, ഭൂമിയുടെ വിവേകപൂർണമായ ഉപയോഗം, നിലവിലെ ഭൂവിനിയോഗത്തെ സംബന്ധിച്ച് സൂക്ഷ്മതല വിവരശേഖരണം, ഭൂവിഭവങ്ങൾ, ഭൂമിയുടെ ഫലഭൂയിഷ്ഠത നഷ്ടപ്പെടൽ, കാര്യക്ഷമമായ ഭൂവിനിയോഗം തുടങ്ങിയ പഠനങ്ങൾ നടത്തുന്നതിൽ സജീവമായി ഇടപെടുന്നു. കൂടാതെ പ്രകൃതി വിഭവങ്ങളുടെ വിവരശേഖരണവും പഠനങ്ങളും ബോർഡ് എറ്റെടുത്ത് നടത്തി വരുന്നു. വിഭവാധിഷ്ഠിതവും വിഷയാനുസൃതവുമായ ഭൂപട നിർമ്മാണം, സ്പേഷ്യൽ ഡാറ്റാബേസ് വികസനം, സ്ഥലപര തീരുമാന സഹായ സംവിധാനം തുടങ്ങിയ മേഖലകളിൽ സാങ്കേതിക സഹായവും ബോർഡ് നൽകി വരുന്നു. മണ്ണ്സംരക്ഷണം,ജലസംരക്ഷണം, പ്രകൃതിവിഭവ സംരക്ഷണം, പരിസ്ഥിതി സംരക്ഷണം, സുസ്ഥിര വികസനംഎന്നീ വിഷയങ്ങളിൽ പൊതുജനങ്ങൾക്കായി ബോധവൽക്കരണപരിപാടികളും വകുപ്പ്നൽകുന്നു.ഇതര വകുപ്പുകൾക്കും തദ്ദേശഭരണസ്ഥാപനങ്ങൾക്കും ഭൂവിനിയോഗം,സ്ഥലസംബന്ധമായ ആസൂത്രണം എന്നിവയിലേക്ക് മാർഗ്ഗോപദേശക സേവനങ്ങളും ഭൂവിനിയോഗ വകുപ്പ് പ്രദാനം ചെയ്യുന്നു.

  ജിയോഇൻഫോർമാറ്റിക്സ‌്ലബോറട്ടറിയുടെ നവീകരണവും ശക്തിപ്പെടുത്തലും സംബന്ധിച്ച പ്രവർത്തനങ്ങൾ 2025-26-ൽ തുടരുന്നതാണ്. വിവിധ വകുപ്പുകളിലും മറ്റു സ്രോതസ്സുകളിലുമുള്ള വിഭവങ്ങളെ ഡിജിറ്റൽ രൂപത്തിലാക്കാനും ഉപഭോക്തൃ സൗഹൃദപരമായ തരത്തിൽ ലഭ്യമായ വിവരങ്ങളെ തദ്ദേശ ഭരണ സ്ഥാപനങ്ങൾക്കും പദ്ധതി ആസൂത്രണം ചെയ്യുന്നവർക്കും, ഭരണകർത്താക്കൾക്കും മറ്റ്വകുപ്പുകൾക്കും പ്രയോജനപ്രദമായ രീതിയിൽ വിവരങ്ങൾ കാലാനുസൃതമാക്കാനും പദ്ധതി ലക്ഷ്യമിടുന്നു.പ്രകൃതിവിഭവങ്ങളെ സംബന്ധിച്ച്വിഷയാടിസ്ഥാനത്തിൽ കണക്കുകൾ നൽകികൊണ്ടു് മഹാത്മാഗാന്ധി തൊഴിലുറപ്പു പദ്ധതിയ്ക്കും ഹരിതകേരള മിഷനും മറ്റ് സർക്കാർ പരിപാടികളിലും ജി.ഐ.എസ് പിന്തുണ നൽകും. ഭൂവിഭവ ആസൂത്രണത്തിന്റെ എല്ലാ വശങ്ങളിലും പുതിയ ഐ.ടി മാതൃക നടപ്പാക്കുന്നതിലെ വെല്ലുവിളികൾ നേരിടാൻ ജിയോ ഇൻഫോർമാറ്റിക്സ് ലാബ് ശക്തിപ്പെടുത്തും. കാസറഗോഡ്, കോഴിക്കോട് ജില്ലകളിലെ പാഴ്ഭൂമിയെക്കുറിച്ച് സ്ഥല വിവര (സ്പേഷ്യൽ) ഡാറ്റാബേസ് 2025-26 കാലയളവിൽ തയ്യാറാക്കും. പഞ്ചായത്തുകളുടെ ഭൂഗർഭജല നിരപ്പ് മെച്ചപ്പെടുത്തുക എന്ന ലക്ഷ്യത്തോടെ ജലവിഭവ പരിപാലനവും ക്രിട്ടിക്കൽ, സെമി ക്രിട്ടിക്കൽ ബ്ലോക്കുകൾക്കായുള്ള സംരക്ഷണ പദ്ധതിയും ഏറ്റെടുക്കും. ബന്ധപ്പെട്ട വകുപ്പുകളിലെ ഉദ്യോഗസ്ഥർക്ക് ജി.ഐ.എസിൽ ഹ്രസ്വകാല പരിശീലനവും വകുപ്പിലെ ജീവനക്കാർക്ക് ഇൻ സർവീസ് പരിശീലനവും വകുപ്പ് നടത്തുന്നുണ്ട്. പ്രകൃതി വിഭവങ്ങളുടെ സംരക്ഷണത്തിന്റെ പ്രാധാന്യം പ്രചരിപ്പിക്കുന്നതിനുള്ള അവബോധപരിപാടികളും 2025-26 പദ്ധതിയിൽ ഉൾപ്പെടുത്തിയിരിക്കുന്നു.